દળણાંના દાણા
ખરા બપોર ચઢ્યે દાણા રે કાઢવા
ઊંડી કોઠીમાં ડોશી પેઠાં રે લોલ
કોઠીમાં પેઠાં ને બૂંધે જઈ બેઠાં
ભૂંસી લૂછીને દાણા કાઢ્યા રે લોલ
સાઠ સાઠ વર્ષ લગી કોઠી રે ઠાલવી
પેટની કોઠી ના ભરાણી રે લોલ
સૂંડલી ભરીને ડોશી આવ્યાં આંગણિયે
દળણાંના દાણા સૂકવ્યાં રે લોલ
સૂકવીને ડોશી ચૂલામાં પેઠાં
થપાશે માંડ એક ઢેબરું રે લોલ
આંગણે ઊગેલો ગલકીનો વેલો
મહીંથી ખલુડીબાઈ નીકળ્યાં રે લોલ
કરાને ટોડલે રમતાં કબૂતરાં
ચણવા તે ચૂપચાપ આવિયાં રે લોલ
ખાસી ખોબોક ચણ ખવાણી ત્યાં તો
મેંડી હરાઈ ગાય આવી રે લોલ
ડોશીનો દીકરો પોઢ્યો પલેગમાં
હરાઈ ગાય કોણ હાંકે રે લોલ
હાથમાંનો રોટલો કરતો ટપાકા
દાણા ખવાતા ન જાણ્યા રે લોલ
રામા રાવળનો ટીપૂડો કૂતરો
ડોશીનો દેવ જાણે આવ્યો રે લોલ
ઊભી પૂછડીએ બાઉવાઉ બોલિયો
ડોશી ત્યાં દોડતી આવી રે લોલ
આગળિયો લઈ હાંફળી ને ફાંફળી
મેંડીને મારવા લાગી રે લોલ
ચૂલા કને તાકી રહી'તી મીનીબાઈ
રોટલો લઈને ચપ ચાલી રે લોલ
નજરે પડી ને ઝપ ટીપૂડો કૂદિયો
ડોશીની નોકરી ફળી રે લોલ
છેલ્લુંય ઢેબરું તાણી ગ્યો કૂતરો
દયણું પાશેર માંડ બાકી રે લોલ
‘એ રે પાશેર કણ પંખીડાં કાજે
મારી પછાડે નખાવજો રે લોલ
કોઠી ભાંગીને એના ચૂલા તે માંડજો
કરજો વેચીને ઘર કાયટું રે લોલ’
-ઉમાશંકર જોશી
Dalananna Dana
Khar bapor chadhye dan re kadhava
undi kothiman doshi pethan re lola
kothiman pethan ne bundhe jai bethan
bhunsi luchhine dan kadhya re lola
sath sath varsha lagi kothi re thalavi
peṭani kothi n bharani re lola
sundali bharine doshi avyan anganiye
dalananna dan sukavyan re lola
sukavine doshi chulaman pethan
thapashe manda ek dhebarun re lola
angane ugelo galakino velo
mahinthi khaludibai nikalyan re lola
karane todale ramatan kabutaran
chanav te chupachap aviyan re lola
khasi khobok chan khavani tyan to
mendi harai gaya avi re lola
doshino dikaro podhyo palegaman
harai gaya kon hanke re lola
hathamanno roṭalo karato ṭapaka
dan khavat n janya re lola
ram ravalano tipudo kutaro
doshino dev jane avyo re lola
ubhi puchhadie bauvau boliyo
doshi tyan dodati avi re lola
agaliyo lai hanfali ne fanfali
mendine marav lagi re lola
chul kane taki rahi'ti minibai
roṭalo laine chap chali re lola
najare padi ne zap tipudo kudiyo
doshini nokari fali re lola
chhellunya dhebarun tani gyo kutaro
dayanun pasher manda baki re lola
‘e re pasher kan pankhidan kaje
mari pachhade nakhavajo re lola
kothi bhangine en chul te mandajo
karajo vechine ghar kayatun re lola’
-umashankar joshi
Source: Mavjibhai