તો મૃત્યુ ન કહો
મ્હેકમાં મ્હેક મળી જાય તો મૃત્યુ ન કહો
તેજમાં તેજ ભળી જાય તો મૃત્યુ ન કહો
રાહ જુદો જ જો ફંટાય તો મૃત્યુ ન કહો
શ્વાસની લીલા સમેટાય તો મૃત્યુ ન કહો
દીર્ઘ યાત્રાની જરૂરતથી સજ્જ થઈ જઈને
એક મંઝિલની લગન આંખે ઊતરવા દઈને
ભાનની ક્ષણને કાળજીથી સમેટી લઈને
‘આવજો’ કહીને કોઈ જાય તો મૃત્યુ ન કહો
જે નરી આંખે જણાયાં ન એ તત્વો કળવા
જે અગોચર છે એ અસ્તિત્વને હરદમ મળવા
દૂર દુનિયાનાં રહસ્યોનો તાગ મેળવવા
દૃષ્ટિ જો આંખથી છલકાય તો મૃત્યુ ન કહો
શબ્દ ક્યાં પહોંચે છે તે જાતે નીરખવા માટે
ભાનની સૃષ્ટિની સીમાને પરખવા માટે
દિલના વિસ્તારની દુનિયાઓમાં વસવા માટે
કોઈ મહેફિલથી ઊઠી જાય તો મૃત્યુ ન કહો
-હરીન્દ્ર દવે
To Mrutyu N Kaho
Mhekaman mhek mali jaya to mrutyu n kaho
Tejaman tej bhali jaya to mrutyu n kaho
Rah judo j jo fantaya to mrutyu n kaho
Shvasani lil sametaya to mrutyu n kaho
Dirgha yatrani jaruratathi sajja thai jaine
Ek manzilani lagan ankhe utarav daine
Bhanani kshanane kalajithi sameti laine
‘avajo’ kahine koi jaya to mrutyu n kaho
Je nari ankhe janayan n e tatvo kalava
Je agochar chhe e astitvane haradam malava
Dur duniyanan rahasyono tag melavava
Drushti jo ankhathi chhalakaya to mrutyu n kaho
Shabda kyan pahonche chhe te jate nirakhav mate
Bhanani srushtini simane parakhav mate
Dilan vistarani duniyaoman vasav mate
Koi mahefilathi uthi jaya to mrutyu n kaho
-harindra dave
Source: Mavjibhai